Pavasars - vuolyudzānu tikšonuos laiks.
Pec treis godu saskarsmis tryukuma
tīšsaistē beidzūt kluotīnē tiksimēs 29. aprelī
skotuvis runys konkursā “Vuolyudzāni” i vaļsts atkluotajā latgalīšu rokstu
volūdys olimpiadē.
Skotuvis runys konkurss “Vuolyudzāni” startēs jau 23. reizi. Ar itū konkursu izauga daudzys jaunīšu paaudzis, konkursā daudzi runuoja pyrmū reizi latgaliski, daudzi pec konkursa suoka i tagad turpynoj dorbuotīs latgaliskajuos aktivitatēs, poši tuos organizej. Tī nav tikai skaneigi vuordi, kas raksteiti konkursa nūlykumā par latgalīšu volūdys kūpšonu, par latgalīšu literaturys īpazeišonu, par sovys identitatis styprynuošonu. Dzejneica Anna Rancāne Vuolyudzānus nūsauce par pavasara prīcu. Byudama ilggadejuo konkursa vierteituoja, jei uzsver, ka vuolyudzāni teik golā ar nūpītnu, dziļu literaturu, ka vacumam muok izavielēt pīmāruotu reperturu. Konkurss līcynoj, ka saimēs ir dzeiva latgalīšu volūda i, golvonais, bārni jū muok i lītoj. Konkursa nūlykumā ir aicynuojums meklēt tekstus jaunuokajā latgalīšu literaturā.
Latgalīšu rokstu volūdys atkluotuo olimpiade byus šūgod pīcuos kuortuos. Tradicionali – pyrmajā kuortā ir latgalīšu volūdys pareizraksteiba, bet pīktajā kuortā – Latgolys kulturtests. Šūreiz trešuo olimpiadis kuorta veļteita Ontonam Slišānam, juo dorbam “Čipierkstneits jeb apcirsto sakņu pieaudzēšana”, akcentejūt latgaliskuos vidis veiduotuojus i O.Slišāna lūmu itamā procesā, bet, sasagatavojūt caturtajai kuortai, jaunīši īpazeis A. Slišānis dorbu “#100dečiLatvijai”.
Olimpiadis ūtruo kuorta veļteita Sibira latgalīšim. Ir pīduovuots olūtu saroksts, kū izmontuot: atrast, pasavērt, laseit, analizēt.
Gaidom pīteikumus itīm pasuokumim! Lyudzu, īvārojit pīteikuma formu i termiņus!
Veronika Dundure, LVLKŠA