22. skotuvis runys konkursa „VUOLYUDZĀNI” nūlykums

8. februāris, 2022 pl. 21:58

Konkursa mierkis

· īpazeit nūvoda literaturu i folkloru, veidojūt izpratni par latgalīšu autoru vuorda muokslu, latgaliski raksteita teksta vierteibu, izteiksmeibu;

· atteisteit školānu skotuvis runys meistareibu, emocionalitati, ceļt runys kulturu;

· izkūpt latgalīšu rokstu volūdu.

Organizātuoji

· Latgalīšu volūdys, literaturys i kulturviesturis školuotuoju asociaceja (LVLKŠA)

· Rēzeknis Tehnologeju akademeja

· Rēzeknis nūvoda pošvaļdeiba

Konkursa nūtikšonys laiks i vīta

Konkurss nūteik 2022. goda aprelī.

Školuotuoji īsyuta sovu audziekņu īrunuotūs daildorbu videoīrokstus leidz 2022. goda 14. apreļam iz e-postu ltgasoc@gmail.com, nūruodūt školāna vuordu, uzvuordu, školu, klasi, školuotuoju, taipat - daildorba autoru i nūsaukumu.

Videoīrokstam:

1) izavielejit klusu telpu ar lobu apgaismuojumu i neitralu fonu;

2) kamerai voi telefona kamerai juobyut nakusteigai, izvītuotai horizontali;

3) ja nav uorejuo mikrofona, tod kameru izvītojit pēc īspiejis tyvuok runuotuojam;

4) runuotuoju juoīkadrej da pusei, lai labi radzātu žestus.

5) Video faila nūformiešonys pīmārs: J_Andzans_Vilanu_vsk_Saulis_stabule (Uzvuords, škola, dorba nūsaukums).

Daleibnīki

· Konkursā pīsadola pyrmsškolys vacuma bārni, 1.–12. klašu školāni, studenti

· Nu vīnys školys pīsadola na vairuok par 2 školānim nu kotrys klašu grupys

· Daleibnīkim nu vīnys školys vālams najimt vīnaidus dorbus

Konkursa gaita

· Konkurss nūteik pa vacuma grupom: pyrmsškola, 1.–4. kl., 5.–8. kl., 9.–12. kl., studenti

· Kotrys konkursa daleibnīks sagatavej 2 daildorbu fragmentus latgaliski

· Videoīrokstā kotrys daleibnīks īrunoj pyrmū prozys voi dzejis fragmentu i ūtrū sagataveitū prozys voi dzejis fragmentu. Īteicams izmontuot i jaunuokū latgalīšu literaturu.

· Kotra literaruo dorba lasejums nadreikst puorsnēgt 3 min.

· Konkursu paprīšku īteicams organizēt školuos

Viertiešona

Konkursantus viertej leidz 22.apreļam LVLKŠA izveiduota komiseja.

Viertej dorba atbiļsteibu vacumam, teksta zynuošonu, kontaktu ar klauseituojim, prasmi

atkluot daildorba nūskaņu, īsakļaušonu laikā.

Apbolvuošona

Atkareibā nu rezultatu konkursa uzvarātuoji kotrā vacuma grupā sajam diplomus i bolvys voi Atzineibys rokstus i pīminis bolvys. Teik gūdynuoti i škuoltuoji – konsultanti.

Videoīrokstus syuteit iz LVLKŠA e-postu: ltgasoc@gmail.com leidz 14. apreļam, nūruodūt školāna vuordu, uzvuordu, školu, klasi, školuotuoju, taipat — daildorba autoru i nūsaukumu.

Informaceju var atrast www.ltgasoc.lv , www.lakuga.lv

LVLKŠA